Svartedauden reduserte folketalet i Noreg med kring 2/3. Eventuelle overlevande frå utkantsgardar som Tirevoll må då ha trekt ned att i dei større bygdene som no mangla folk. Dermed forfall gardane att og vart til slutt liggjande øyde. Då folketalet steig att på 1500-talet og det på nytt vart dårleg med plass rundt om på bygdene vart så mange av desse gardane rydda og tekne i bruk att. I vår krins inkluderte dette, ifylgje bygdeboka, ikkje berre Tirevoll, men òg Horsås, Mosevoll, Nordre Håland og Fugledale. Alle desse bruka stammar altså då, ifylgje Osterøy Bygdebok, opprinneleg frå 12-1300-talet, dvs. høgmellomalderen.

Garden eg vil konsentrera meg om her er altså Tirevoll, eller rettare folka på Tirevoll,  dei som sidan garden vart rydda på nytt kring 1590 har oppretthalde liv og heim i kampen mot desse forfallskreftene. Hovudsaka for meg her er altså dei individuelle lagnadene og slektsrelasjonane som er involverte slik desse er dokumenterte i ulike kjelder (ei kjeldeoversikt er teken med på slutten). Men knytt til dette vil eg i margen og fotnotar også notera litt av det som skjer i samfunnet kring dei.

Det viste seg at emnet naturleg ordna seg i 10 bolkar/delar ut frå dei viktigaste brukarskifta som skjedde.  Kvar av desse bolkane vil då her få si eiga underside. I linkane til venstre er bolkane nummererte og gjevne namn etter brukarfamiliane (brukarane i parantes) slik dei avløyste kvarandre frå ca. 1590 (øverst) til vår tid (nederst). Det er følgeleg berre å klikka seg gjennom linkane ovanfrå og nedover (eller klikka på «pilen» på kvar side) for å få ei kronologisk oversikt over folka som opp gjennom tida har budd på Tirevoll og liva deira i korte trekk. I to «etterord» under desse bolkane vil eg så fortelja litt meir om kva som skjedde etter at den siste brukaren, Nils Bastesen, selde garden i 1953, samt gardens status i dag. 

Bakerst er det lagt inn ei eiga biletside. God lesning!